குழந்தை காப்பகங்களில் பணியாளர்கள், சமையலர் பணிக்கு விண்ணப்பிக்கலாம் கலெக்டர் மு.கருணாகரன் தகவல்

நெல்லை,

நெல்லை மாவட்டத்தில் குழந்தை காப்பகங்களுக்கு பணியாளர்கள், சமையலர் பணிக்கு விண்ணப்பம் செய்யலாம் என கலெக்டர் மு.கருணாகரன் தெரிவித்துள்ளார்.

இதுகுறித்து அவர் வெளியிட்டுள்ள அறிக்கையில் கூறி இருப்பதாவது:–

குழந்தைகள் காப்பகம்

ஒருங்கிணைந்த குழந்தை வளர்ச்சி பணிகள் திட்டத்தின் கீழ் நெல்லை மாநகராட்சி பகுதியில் 2, நகரசபை பகுதியில் 4, நகர பஞ்சாயத்து பகுதிகளில் 9, கிராம பஞ்சாயத்து பகுதிகளில் 6 ஆகிய பகுதிகளில் மொத்தம் 21 குழந்தை காப்பகங்கள் அமைக்கப்பட்டு உள்ளன. இந்த காப்பகங்களுக்கு குழந்தைகள் காப்பக பணியாளர் மற்றும் சமையலர் பணி நியமனம் செய்வதற்கு விண்ணப்பங்கள் வரவேற்கப்படுகின்றன. க

தொகுப்பூதியம்

பணி நியமனம் தற்காலிகமானது. அங்கன்வாடி குழந்தைகள் காப்பக பணியாளர்களுக்கு மாத தொகுப்பூதியம் ரூ.3 ஆயிரமும், சமையலருக்கு மாத தொகுப்பூதியம் ரூ.1,500–ம் வழங்கப்படும். 1–1–2016 அன்று 25 வயது முதல் 35 வயது வரை உள்ளவராக இருக்க வேண்டும். எஸ்.எஸ்.எல்.சி. தேர்ச்சி பெற்று இருக்க வேண்டும். குழந்தைகள் காப்பகம் அமைந்துள்ள பகுதியில் வசிப்பவராக இருக்க வேண்டும்.

சமையலர் பணிக்கு 1–1–2016 அன்று 20 வயது முதல் 40 வயது வரை உள்ளவராக இருக்க வேண்டும். தமிழில் எழுத படிக்க தெரிந்து இருக்க வேண்டும். காலிப்பணியிடங்கள் இன சுழற்சி முறையில் நடைபெற உள்ளது.

15–ந் தேதி

விண்ணப்பங்கள் வருகிற 15–ந் தேதி மாலை 5 மணி வரை அந்தந்த குழந்தை வளர்ச்சி திட்ட அலுவலகத்தில் நேரடியாகவோ அல்லது தபால் மூலமாகவே வரவேற்கப்படுகிறது.

இவ்வாறு நெல்லை மாவட்ட கலெக்டர் மு.கருணாகரன் வெளியிட்டுள்ள அறிக்கையில் கூறப்பட்டு உள்ளது.